O Consorcio da Zona Franca de Vigo estudará a proposta da firma galega Bandalux, que se postulou para crear unha aceleradora que permitirá impulsar novos proxectos empresariais en Galicia. O delegado do Estado, David Regades, visitou o centro produtivo da empresa en Moraña, xunto co director xeral da compañía, Miguel Comesaña.
“Zona Franca iniciou o proceso para pór en marcha unha nova aceleradora de empresas dun sector estratéxico da economía galega, tras o éxito de VíaExterior, MarExterior, CulturaExterior e VinoExterior”, subliñou Regades. Neste sentido, indicou que partindo de doce sectores económicos “clave” preténdese seleccionar unha empresa dun deles para que sexa a que lidere este programa.
Bandalux, que ten a súa sede en Moraña e conta con outras plantas en Barcelona, Italia e Miami, ten un proxecto para desenvolver un novo centro multifuncional de 7.000 metros cadrados en Galicia, onde pretende acoller unha aceleradora de proxectos empresariais.
A compañía naceu en 1986 co lanzamento ao mercado da cortina vertical. Nestes máis de 35 anos de historia, segundo recolle Zona Franca nun comunicado, evolucionou para seguir liderando o sector. Ademais do mercado residencial, tamén ofrece solucións para calquera proxecto arquitectónico ou de interiorismo a través da liña Contract e os seus estores chegan desde Moraña a catro continentes.
