O guitarrista americano Pat Metheny, un dos grandes artistas da escena jazz contemporánea, actuará o próximo 17 de xuño no Auditorio Mar de Vigo, na 11ª edición do ciclo Xacobeo Importa (antes Galicia Importa).
Esta será a segunda actuación do músico na cidade, tras o seu concerto de 1998, e presentará o seu novo traballo, ‘Side Eye’, tras máis de 40 anos de traxectoria, 60 álbums de estudo e 20 premios Grammy.
Pat Metheny tocou cos máis grandes músicos en todos os rexistros posibles: desde Jaco Pastorius a Ornette Coleman, Sonny Rollins a David Bowie, Steve Reich a Milton Nascimento, pasando por Antonio Carlos Jobim, Enrique Morente ou Herbie Hangcock, entre outros moitos.
Na programación desta edición de Xacobeo Importa están tamén confirmados os concertos de Eagles of Death Metal, en Santiago o 23 de abril; White Lies e Charming Liars tamén en Santiago o 15 de maio; The James Hunter Six en Ourense o 28 de maio; Leon Bridges o 10 de xullo en Vigo; e Jacob Collier o 27 de xullo en Santiago.
