A posible afección cardíaca do tripulante dun barco activou na madrugada deste xoves un operativo de rescate no mar, preto de Vigo, informou o 112 Galicia. A embarcación atopábase a unha hora e media das costas de Vigo, polo que foi necesaria a mobilización dun equipo do Servizo de Gardacostas de Galicia.
O aviso sobre este operativo activouse no 112 Galicia pouco antes das 1,00 horas deste xoves despois de recibir a información por parte do equipo interveniente e tamén de Salvamento Marítimo en Fisterra. Co fin de ter preparada a asistencia médica do enfermo, os xestores do 112 comunicaron a evacuación aos profesionais de Urxencias Sanitarias de Galicia-061, que organizaron a recepción do afectado no Hospital Álvaro Cunqueiro da cidade de Vigo.
