O alcalde de Vigo, Abel Caballero, presumiu este mércores de que “o fenómeno” da cidade estúdase en universidades “de toda España” e que recibe numerosas peticións de estudantes e investigadores para entrevistalo porque queren coñecer a súa actividade e o seu modelo de cidade.

Nunha rolda de prensa, o rexedor olívico sinalou que atende con frecuencia solicitudes de estudantes universitarios para traballos de fin de grao ou de fin de máster, así como de alumnos de institutos e colexios. Este mércores, por exemplo, desvelou que se entrevistará con estudantes da Universidade Carlos III de Madrid. “Cada vez que me chaman dalgunha universidade aténdoos, queren entrevistar o alcalde de Vigo, como é natural”, apuntou.

Respecto diso, sinalou que atende todas esas solicitudes porque lle gusta “apoiar a investigación” e porque desexa “que se coñeza o que sucede en Vigo, que é un modelo de acción municipal e política”.