O grupo municipal do PP no Concello de Vigo esixiu este martes ao goberno local encabezado por Abel Caballero que aclare que edil ou edís están detrás das “presións” a entidades e asociacións da cidade para que asinasen “un papel en branco” que supón a súa adhesión á petición de indulto do exfuncionario condenado a máis de 5 anos de cárcere por ‘enchufar’ nunha concesionaria municipal a unha cuñada de Carmela Silva.

Nunha rolda de prensa, o portavoz municipal dos ‘populares’, Alfonso Marnotes, denunciou a existencia dunha “trama”, xa xulgada e condenada, para contratar á cuñada da tenente de Alcalde (e presidenta da Deputación) e pagarlle máis de 100.000 euros por traballos que non fixo. Así mesmo, apuntou que hai “outra trama” do PSOE vigués “detrás das presións e manobras” exercidas con respecto a asociacións veciñais, culturais, deportivas e comunidades de montes que asinaron a adhesión ao indulto, por medo a perder subvencións do Concello.

Segundo Marnotes, é unha trama “integrada por socialistas vigueses, autorizada polo goberno local, mesmo con concelleiros do propio goberno”, que actuaron “por mandato” dese goberno. Por iso, esixiu que se aclare que edís participaron nesas “presións”, “quen deu a orde de contactar con esas asociacións concretas e quen as seleccionou”, porque tivo que ser alguén que “manexa información municipal” e é coñecedor das axudas outorgadas desde o Concello.

“Actuouse coordinadamente, en segredo, en poucos días e en nome do goberno local. Todo apunta a que se fixo desde o Concello, e puidéronse usar recursos municipais”, proclamou o portavoz do PP, que tamén esixiu “que cesen as presións” e non se tomen “represalias” contra as entidades que “resistiron” a esas presións e non asinaron a adhesión ao indulto.