Axentes da Policía Nacional da Comisaría de Vigo detiveron dous veciños da cidade, de 35 e 36 anos de idade, ambos con múltiples antecedentes, como presuntos autores dun delito de tentativa de homicidio, tras atacar cunha navalla a outros dous mozos no exterior dun local de copas.

Segundo informaron fontes policiais, os feitos ocorreron na madrugada do pasado 22 de xaneiro, cando catro mozos (tres homes e unha muller veciños do Morrazo) se atopaban gozando dun concerto nun local de copas de Vigo.

Os mozos decatáronse de que se estaba producindo unha liorta no exterior do establecemento e saíron para intervir e evitar unha agresión. Durante a pelexa decatáronse de que unha das persoas sangraba abundantemente por unha man e lle caeu un teléfono móbil cunha funda transparente na que había un dólar dobrado.

As testemuñas recolleron o teléfono e, cando se dispuñan a devolverllo ao seu dono, foron increpados e ameazados por dous homes. Así, ao berro de “mátaos”, un dos homes achegouse a un das testemuñas e cravoulle unha navalla de grandes dimensións nun costado.

Un amigo da vítima achegouse a socorrelo e recibiu tamén unha puñalada, á altura do corazón, quedando tendido no chan. Nese momento, o autor material do ataque e o inductor fuxiron do lugar á carreira.

FERIDAS POTENCIALMENTE MORTAIS

Os dous mozos feridos foron atendidos nun primeiro momento polos seus amigos, que taponaron as feridas ata a chegada dos efectivos de urxencia sanitaria, que levaron aos dous a un centro hospitalario. Unha das vítimas recibiu puntos de sutura no costado dereito, e o outro no pectoral esquerdo, feridas que, segundo os informes médicos, “puideron causar a morte de ambos”, algo que se evitou “polo espesor da roupa que vestían”.

A Policía iniciou as pescudas para dar cos autores deste ataque, entrevistando as testemuñas e ás propias vítimas, que achegaron descrición física dos implicados. Os presuntos agresores foron recoñecidos a través de fotografías “sen ningún xénero de dúbidas”.

Unha vez identificados, a Policía realizou unha entrada e rexistro no domicilio no que viven os sospeitosos, e comprobaron que o presunto autor material dos apuñalamentos presentaba unha ferida na man esquerda, producida durante a liorta e que, ademais, utilizaba un teléfono móbil como o descrito polas testemuñas.

INGRESO EN PRISIÓN

O autor material do ataque é un home de 36 anos de idade, nacido en República Dominicana, con antecedentes policiais e orde de expulsión en vigor (que non se puido facer efectiva por protocolos sanitarios). Mentres, o inductor é un home de 35 anos de idade, de nacionalidade española, tamén con antecedentes.

Tras o seu paso por dependencias policiais, ambos foron postos a disposición do xulgado, que decretou o ingreso en prisión do autor das navalladas por dous delitos de homicidio en grao de tentativa. O outro detido foi posto en liberdade coa condición de investigado, e deberá presentarse semanalmente nos xulgados.