O comité de persoal do hospital Povisa de Vigo (que pertence ao grupo Ribera Salud) advertiu este xoves de que non descarta convocar folga se se non se avanza na negociación dun novo convenio colectivo e se a empresa non acepta mellorar as condicións dun persoal que leva 12 anos sen actualizar os seus salarios.

Así o trasladaron nunha rolda de prensa na que a presidenta do comité, Chus Neira (CIG), explicou que, a pesar das 14 reunións mantidas ao longo do ano pasado coa dirección do centro para pactar un novo marco de relacións laborais, non se chegou a ningún acordo. Os principais escollos están no aumento dos salarios, os procesos de promoción interna e a xornada. Con respecto aos soldos, a empresa ofrece un 1% para 2021, un 1,5% para 2022 e un 2% para 2023, mentres que o comité reclama un 3% en 2021, un 3% en 2022 e un 3,5% en 2023. “Non pedimos unha subida descomunal”, indicou Neira, que lembrou que o 2021 pechou cun IPC do 6,5%.

Por outra banda, os sindicatos denunciaron que o persoal padece tamén constantes cambios nas súas xornadas, o que imposibilita a conciliación, e lamentaron que “están marchando moitos traballadores, mesmo veteranos con contrato fixo” porque prefiren estar no Sergas aínda que traballen de forma eventual.

“Coa anterior dirección (grupo Silveira) tivemos dez anos o convenio conxelado, houbo despedimentos, viviamos en constantes conflitos (…), e criamos que o Grupo Ribera (propietarios do hospital desde hai dous anos e medio) ía tratar de mellorar as nosas condicións, pero as cousas non cambiaron case nada”, sinalou a presidenta do comité.

Ante esa situación de bloqueo, os traballadores iniciaron xa as protestas, con concentracións e outros actos, como a ‘sentada’ e manifestación prevista para este xoves nas inmediacións do hospital. No entanto, advertiron os sindicatos, se no prazo de 15 días a empresa non pon sobre a mesa unha oferta aceptable para volver negociar, valorarán a convocatoria de folga.