A Asociación de Veciños e Empresarios de Cabral (Aveeca) denunciou este luns que a Comunidade de Montes da parroquia mantén polo menos seis demandas contra particulares para reclamarlles as súas leiras, a pesar do compromiso trasladado polo presidente da entidade, de que só reclamarían parcelas de entidades e empresas de certa envergadura.
A través dun comunicado, Aveeca sinalou que os comuneiros están litigando pola titularidade dunha parcela de 4.500 metros cadrados con dúas edificacións (e catro vivendas afectadas), unha plantación de kiwis de 1.400 metros cadrados, unha leira pechada de 2.800 metros cun chalé en construción, e outro tres terreos, de entre 1.250 e 3.460 metros cadrados.
E iso a pesar de que a xunta reitora da Comunidade de Montes “asegurou que o seu obxectivo non son os particulares, senón as parcelas ocupadas por entidades e empresas de certa envergadura“, unha posicion que o propio presidente da entidade comunal “defendeu publicamente ante 150 persoas nunha reunión organizada por Aveeca a mediados de decembro pasado”.
Esta asociación de veciños e empresarios lembrou que o argumento que usa a Mancomunidade para reclamar a titularidade das parcelas é sempre o mesmo: que a propiedade do monte é súa desde “tempo inmemorial” e que esta quedou plasmada en levantamentos administrativos da última década do século XIX.
Con todo, os particulares e empresas afectadas obxectan que os seus títulos se remontan, en moitos casos, a principios do século XX, e que hai propiedades inscritas no rexistro desde hai décadas. Entre os afectados tamén hai leiras permutadas no seu día co Concello e todos eles gozaron deses terreos ata que, “sorpresivamente”, din, a Mancomunidade de Montes iniciou unha “campaña de reclamacións” hai dous anos.
