O Bloque Nacionalista Galego (BNG) presentou este venres en Vigo a campaña ‘Queremos tren’ e as iniciativas que a acompañan para que o Goberno central implante un servizo de proximidade na área metropolitana da cidade olívica, así como no resto das áreas urbanas de Galicia.

Neste sentido, o deputado do BNG no Congreso, Néstor Rego, defendeu o ferrocarril como medio de transporte “eficaz, eficiente e sustentable”, polo que apostou pola modernización tanto das infraestruturas como das redes e dos servizos.

A campaña ‘Queremos tren’ busca unha rede ferroviaria galega que brinde un servizo de transporte sustentable e de calidade. Para o BNG, non pode entenderse que, “a estas alturas do século XXI”, non estean implantados os servizos de proximidade.

“Un servizo de proximidade implica traxectos específicos, de curta distancia, con horarios e maiores frecuencias e tamén con prezos específicos”, reivindicou Rego, tal como recolle o BNG nun comunicado.

Segundo el, na actualidade está a producirse un “proceso de desmantelamento” dos servizos ferroviarios en Galicia, coa eliminación de servizos, “e sen que se recuperen aínda os horarios e frecuencias de antes da pandemia”.