A Garda Civil detivo tres persoas no marco dun operativo no que se investiga a varias persoas pola suposta venda de boletos falsos de lotaría dunha suposta entidade de discapacitados.

Fontes consultadas informaron da detención de tres persoas, en Vigo e en Moaña, e da investigación doutros implicados, nunha rede que ten tamén ramificacións en Estremadura, País Vasco e Andalucía.

As actuacións son coordinadas desde o xulgado de instrución número 6 de Vigo e fontes xudiciais confirmaron que se investiga dúas mulleres en relación con estes feitos, como presuntas autoras dun delito de estafa e un contra a Facenda Pública.

Así mesmo, practicáronse rexistros en dúas vivendas situadas en Vigo e noutra vivenda no partido xudicial de Cangas; e rexistrouse tamén unha imprenta na localidade de Moaña, na que supostamente se confeccionaban estes boletos.

Segundo as mesmas fontes, as mulleres investigadas dedicábanse a elaborar e vender eses boletos, coma se fosen dunha asociación de discapacitados que, en realidade, non existe. Así mesmo, facían crer ás vítimas da estafa que o sorteo polo que se rexían os billetes era o sorteo diario do cupón do ONCE.