A Universidade de Vigo (UVigo) e a Sociedade anónima de Obras e Servizos Copasa están a desenvolver o proxecto ‘Railway Inspection and Information Model’, que permitirá un mantemento preditivo de vías férreas a través da análise de información recompilada por sensores.

Tal como publica o Diario da Universidade de Vigo (Duvi), trátase dunha iniciativa na que se traballará durante tres anos co obxectivo de mellorar as operacións de inspección e mantemento da estrutura das vías de trens co emprego de sistemas ópticos de última xeración e algoritmos para o tratamento automático da información.

Iniciado en outubro de 2021, o proxecto desenvolverase ata setembro de 2024, contando co financiamento das liñas estratéxicas do Ministerio de Ciencia e Innovación. Por parte da UVigo participa o grupo de Enxeñaría Física, con sede na Escola de Enxeñería Aeronáutica e do Espazo do campus de Ourense.

“Esta é a primeira vez que levamos a cabo un proxecto con Copasa e estamos moi satisfeitos de poder abrir esta liña de colaboración. Valoramos moi positivamente este tipo de iniciativas nas que se pode transferir ao tecido produtivo investigación que se realiza no campus de Ourense”, indicou o investigador principal Higinio González.

Segundo indican, a colaboración entre as dúas entidades busca mellorar a eficiencia da inspección e o mantemento das liñas de ferrocarril, polo que destacaron a importancia a nivel internacional de Copasa pola súa capacidade de construír grandes proxectos de infraestruturas, tras participar, por exemplo, no AVE entre A Meca e Medina, en Arabia Saudita.