Axentes da Policía Local de Vigo detiveron a un veciño da cidade, O.M.A.L., de 27 anos de idade e da República Dominicana, como presunto autor dun delito de violencia de xénero, por maltratar física e psicoloxicamente á súa parella e nai dos seus dous fillos. Segundo informaron fontes policiais, na noite deste luns unha dotación do 092 desprazouse a un domicilio da rúa Travesía de Vigo tras ter coñecemento dun posible episodio de violencia de xénero.

Ao chegar, os axentes entrevistáronse cunha muller que se atopaba en estado de ansiedade, incapaz de relatar o ocorrido sen porse a chorar, e asustada. Segundo puido explicar, mantiña unha relación co mozo dende había uns 3 anos, froito da cal tiveran dous fillos. Desde a metade da relación, o home comezara a maltratala psicoloxicamente, chegando mesmo ás agresións físicas, todo co fin de obrigala a abandonar a vivenda. Esta situación levou a que a muller tivese que ser tratada por ansiedade e depresión, e xeroulle un gran temor cara á súa parella, da que iniciou os trámites de separación.

A muller explicou que, poucos días antes, el agredíraa e que esa mesma noite tentou entrar no inmoble, provocándolle unha nova crise de ansiedade, ante o temor de ser novamente agredida. Unha amiga que a acompañaba foi a que solicitou a presenza da Policía. A vítima tamén sinalou que, a pesar dos trámites de separación, o home regresaba ao domicilio de forma reiterada, provocando este tipo de situacións violentas. Por estes feitos, os axentes procederon á súa detención, como autor dun suposto delito de violencia de xénero.