A Fiscalía pide penas que suman 8 anos e un mes de cárcere para un acusado de dous atracos, un deles en grao de tentativa, cometidos a punta de coitelo en senllos establecementos de Vigo, e que será xulgado este martes na sala do Penal 3 da cidade.
Segundo o escrito de acusación pública, o 24 de setembro de 2021 o acusado, que ten antecedentes por roubos, entrou nunha tenda de produtos ecolóxicos e ameazou cun coitelo á responsable do establecemento, á que lle esixiu o diñeiro da caixa (uns 40 euros).
Tras marchar do lugar, poucos minutos despois, entrou nunha oficina dunha inmobiliaria e tamén ameazou ao seu responsable para levar o diñeiro, pero non o conseguiu porque a muller pediu auxilio. O acusado saíu fuxindo sen levar nada.
Por estes feitos, a Fiscalía atribúelle dous delitos de roubo con intimidación, un deles en grao de tentativa, e con uso de instrumento perigoso. O ministerio público pide que se aplique a atenuante de drogadicción e a agravante de reincidencia, e reclama penas que suman 8 anos e 1 mes de cárcere, ademais de devolver os 40 euros que levou da tenda.
ATRACO A UNHA FARMACIA
Por outra banda, o xulgado do Penal 2 de Vigo acollerá o mércores un xuízo contra un acusado de atracar unha farmacia da cidade, que é reincidente, e para o que a Fiscalía pide 5 anos de cárcere.
Os feitos ocorreron en abril de 2019, cando o procesado entrou nunha botica da Avenida de Ramón Neto, coa cara cuberta por un pasamontañas e esgrimindo unha arma branca. Tras ameazar ás empregadas levou 400 euros.