O Consorcio da Zona Franca de Vigo suspendeu o acto de entrega dos Premios Ardán, que estaba previsto que se celebrasen este xoves, polo loito oficial decretado en Galicia con motivo do naufraxio do barco ‘Villa de Pitanxo’ en Terranova.
Segundo informaron, Zona Franca buscará unha nova data para a celebración do acto de entrega destes premios, que este ano se retomaba tras a parada pola pandemia e que ían recibir o exministro de Sanidade, Salvador Illa, pola súa “excelencia” á fronte dunha carteira “clave” do Goberno durante a pandemia, e 12 compañías galegas pola súa “excelencia empresarial”.
O delegado do Estado na Zona Franca, David Regades, quixo enviar no seu nome e “no do Consorcio da Zona Franca de Vigo unha mensaxe de condolencia ás familias e amizades da tripulación do arrastreiro conxelador con base en Marín e o apoio e solidariedade con todo o sector do mar, que sofre unha nova tráxica perda”, asegurou.
