Catro alumnas da Universidade de Vigo foron recoñecidas este xoves como referentes nas áreas das áreas de ciencias e enxeñarías (STEM), nunha nova edición dos premios ‘GirlGeekCovid’, que impulsan a institución académica e a Deputación de Pontevedra, no marco da Cátedra Feminismos 4.0.
Así, Ana Ramírez, estudante do Master de Biotecnoloxía Avanzada, e Marielena Márquez, do de Enxeñaría de Telecomunicación, resultou as gañadoras do certame este ano; mentres que Uxía López, do Grao de Química, e Andrea Busto, do Master de Telecomunicación, recibiron senllos accésit.
A finalidade desta convocatoria é recoñecer ás alumnas cos expedientes máis brillantes, nunhas áreas, as de Ciencias, Tecnoloxía, Enxeñaría e Matemáticas, nas que as mulleres seguen sendo minoría, e apenas representan o 32 % do alumnado total.
Os premios foron entregados na sede da Deputación en Vigo, onde a presidenta do organismo provincial, Carmela Silva, destacou que estas estudantes “formarán parte da transformación que vivimos e serán un referente para moitas mozas que teñen que tomar decisións vitais”.
Ademais, Silva recalcou que “hai que pór en valor e visibilizar o traballo das mulleres”, que deben ocupar “o lugar que lles corresponde, en igualdade de oportunidades”.
Pola súa banda, o reitor da Uvigo, Manuel Reigosa, avogou pola eliminación dos estereotipos, para que as mulleres novas poidan desenvolver as súas traxectorias naquilo que lles gusta, e puxo en valor o exemplo das premiadas. “Vexo a catro mulleres moi novas, coas ideas moi claras e que, estou seguro, van funcionar como referentes para que esta loita, que é a de toda a sociedade que quere a igualdade, incluídos a maior parte dos homes, non decaia nunca”, proclamou.
Cada unha das dúas alumnas gañadoras recibirá 2.000 euros, mentres que as que obtiveron o accésit obterán 1.000 euros. O xurado valorou tanto o seu expediente académico (nota media ata o curso 2020-21 igual ou superior a 7 nas titulacións de enxeñaría e igual ou superior a 8 nas da rama de Ciencias), como a súa motivación e as súas reflexións sobre o seu papel nuns ámbitos aínda masculinizados.
