O xulgado de Instrución número 4 de Vigo deu por finalizada a investigación xudicial sobre os supostos abusos sexuais por docentes na Escola de Arte Dramática, e ordenou que se siga a causa contra dous dos profesores denunciados, mentres que decretou o sobresemento con respecto a outro profesor, ao entender que os feitos denunciados xa prescribiron.

Segundo informaron fontes do Tribunal Superior de Xustiza de Galicia (TSXG), o xuíz sinala que os feitos foron denunciados o 19 de outubro de 2020 e, a efectos de prescrición, deben terse en conta os que foron cometidos con posterioridade ao 19 de outubro de 2015. Tendo isto en consideración, decretou o sobresemento das actuacións con respecto a un dos docentes, que foi denunciado por sete alumnas.

Con respecto aos dous profesores contra os que seguen as actuacións, foron denunciados por dous estudantes (unha delas denunciou a un dos docentes, e a outra aos dous), como autores de supostos delitos de acoso e/ou abuso sexual.