O vicepresidente segundo da Xunta e conselleiro de Economía, Empresa e Innovación, Francisco Conde, asegurou que o Goberno galego apoiará as propostas de compra de Hijos de J. Barreras que permitan manter a actividade e o emprego.

En declaracións aos medios antes de acudir este martes en Vigo á presentación do informe BDO de ‘Retos e perspectivas de investimento en Galicia para 2022’, Conde indicou que a Xunta estará sempre coas propostas que manteñan a actividade do estaleiro vigués e tratará de facilitar que saia adiante unha compra que garanta a carga de traballo.

Tal como explicou, agora os administradores concursais teñen o “reto” de avaliar cal das tres propostas de compra é a mellor para dar continuidade á empresa, polo que a Xunta estará en contacto con todas as partes para saber como avanzará esta decisión. Todo iso despois de que nos últimos días se desen a coñecer as ofertas de compra que recibiu o estaleiro, que se sitúan entre os 2 millóns de euros, mantendo o persoal actual da compañía, e os 8 millóns de euros, quedándose só con 20 traballadores.

STELLANTIS

Por outra banda, Conde foi preguntado sobre as palabras do conselleiro delegado do fabricante automobilístico Stellantis, Carlos Tavarés, que lamentou a actitude do Goberno español na súa relación co mundo do automóbil.

Así, o conselleiro destacou que este sector necesita “respostas” para afrontar o reto da electrificación e os investimentos que isto supón. Para el, as críticas de Tavares “teñen todo o sentido” porque se necesita un maior diálogo e unha resposta por parte do Executivo de Pedro Sánchez a través do Perte (Proxecto Estratéxico para a Recuperación e Transformación Económica) de automoción.

Un Perte do cal “non se coñece o texto final” da convocatoria. “Esperemos que haxa unha reacción por parte do Goberno para pór en igualdade de condicións a todos os fabricantes e a necesidade que ten a industria de automoción”, sentenciou Conde.