A factoría do grupo Stellantis en Vigo clausurou este luns o seu programa Factoría 4.0 de Automoción, tras máis de 5 anos de desenvolvemento e a realización de accións de I+D por valor de 145 milloes de euros.

O acto de clausura celebrouse na planta viguesa, coa presenza do director da fábrica, Ignacio Bo, e do vicepresidente económico da Xunta, Francisco Conde, ademais de responsables do Cluster de Empresas de Automoción de Galicia (CEAGA) e do Centro Tecnolóxico do Automóbil de Galicia (CTAG).

Este programa cumpriu dous obxectivos fundamentais: por unha banda, deseñar os procesos para a fábrica do futuro (virtual, conectada, áxil, flexible e humana), e desenvolver e validar produtos para o vehículo do futuro (autónomo, conectado, limpo, atractivo e alcanzable”.

O programa, no que colaboraron o sector, o CTAG e a Xunta de Galicia, desenvolveuse ao longo de 62 meses e, baixo o seu ‘paraugas’, puxéronse en marcha máis de 300 actuacións encamiñadas a lograr eses obxectivos. Así, tras máis de 2 millóns de horas de traballo de enxeñaría avanzada, foron rexistradas 36 patentes.

INTERVENCIÓNS

Na súa intervención durante o acto de clausura, Francisco Conde puxo en valor a “aposta” da Xunta por impulsar a dixitalización e a sustentabilidade na industria da automoción, e subliñou que o goberno galego vai seguir “acompañando” ao sector para que poida afrontar os retos do futuro.

O vicepresidente económico destacou que, a pesar das dificultades xeradas pola crise mundial de subministracións, a industria da automoción en Galicia logrou aumentar algo máis dun 13 % as súas exportacións (máis de 5.800 millóns de euros), que representan o 28 % do total das exportacións da comunidade.

Con todo, Conde volveu a reclamar ao Goberno de España que estableza criterios obxectivos para que o proxecto AutoÁncora poida estar representado no PERTE do vehículo eléctrico e conectado que xa conta co visto e prace da UE. Así, pediu “axilidade” na execución e que as Comunidades Autonómas poidan participar na xestión dos fondos europeos en materia de industria.

Pola súa banda, o director da planta de Stellantis en Vigo, Ignacio Bo, sinalou que a factoría foi “visionaria” ao pór en marcha este proxecto en 2016. Así mesmo, valorou os resultados obtidos, que “melloran a produtividade” da propia fábrica e do sector, “abrindo os camiños a novos programas de innovación e desenvolvemento”.

O director xeral do CTAG, Luís Moreno, destacou que este programa supón “unha verdadeira oportunidade para arraigar un I+D+i galega de alto valor engadido”, e permite desenvolver e afianzar competencias para abordar os desafíos presentes e futuros.