Galicia despediu o décimo mes do ano con 33 novos contaxios de covid-19, tres menos que a xornada anterior e en niveis similares aos mantidos ao longo da última semana. Isto nun domingo no que se produciu un lixeiro repunte nos casos activos, ata os 524, e no número de hospitalizados, que soben a 30, aínda que se mantén en cinco o total de pacientes en UCI.
Así se desprende do último balance ofrecido pola Consellería de Sanidade, publicado na mañá deste luns 1 de novembro con datos solicitados ata as 18,00 horas do domingo. Nese momento, o número de novos contaxios detectados durante as últimas 24 horas ascendía a 36 nunha xornada coa taxa de positividade no 1,9%, dúas décimas superior ao día anterior.
A situación nos hospitais reflicte certa estabilidade, aínda que se dá un incremento no total de pacientes covid hospitalizados, que se eleva a 30, dous máis que o sábado. Isto débese ao número de ingresados en unidades convencionais, que sobe en 2, mentres que na UCI sigue habendo cinco pacientes covid.
Por áreas sanitarias, a presión hospitalaria sobe na Coruña e en Ourense. Na primeira aumenta nun, ata os sete, os pacientes en unidades convencionais e segue nun a cifra de ingresados en UCI; mentres que na ourensá, sen críticos, aumenta ata o sete tamén (máis dous nas últimas horas).
Por contra, descenden os ingresados en Lugo, que suma un hospitalizados en unidades convencionais e outro en críticos. No resto de distritos sanitarios non se producen novidades: Vigo (cinco en planta, un en UCI); Santiago-Barbanza (tres en planta, un en UCI); Pontevedra (un en planta, cero en UCI) e Ferrol (un en planta, un en UCI).
MANTÉÑENSE OS CASOS ACTIVOS
En canto aos casos activos de Covid, despois de romper a tendencia alcista da última semana cos datos do domingo, este luns volve incrementarse o total lixeiramente ao aumentar ata os 524, doce máis que 24 horas antes.
Así, as infeccións activas aumentan en todas as áreas salvo en Lugo, onde baixan nun; e en Pontevedra, que descenden en dous. O resto presentan incrementos: Ourense (+5), Vigo (+4), Ferrol (+3), A Coruña (+2), Santiago e Barbanza (+1).
Deste xeito, a área da Coruña e Cee mantense como a que máis casos suma, con 144; seguida da de Ourense, con 111; a de Vigo, con 7; Pontevedra e O Salnés, con 59; Santiago e Barbanza, con 53; Ferrol, con 40; e Lugo, con 38.
BAIXAN OS CONTAXIOS
Pola súa banda, o número de contaxios detectados en 24 horas baixan lixeiramente ao ser diagnosticados durante o último día un total de 33 casos, tres menos que na xornada anterior.
Deste xeito, o último dato mantense nos baremos dos últimos días nunha semana na que os 60 do venres marcaron o teito e os 24 do luns, o chan. O luns 11 de outubro rexistráronse 14, a cifra máis baixa desde que Galicia entrou en niveis de ‘nova normalidade’.
Por tanto, as persoas contaxiadas en Galicia desde o inicio desta pandemia aumentan a 183.258, das que 43.289 corresponden á área da Coruña e Cee; 37.789, á de Vigo; 27.090, á de Santiago e Barbanza; 21.886, á de Ourense; 21.512, á de Pontevedra e O Salnés; 20.015, á de Lugo; e 11.677 á de Ferrol. Segundo os datos de Sanidade, desde o inicio desta crise sanitaria realizáronse en Galicia 2.898.575 PCR.
En canto á taxa de positividade das probas PCR –número de infeccións detectadas cada 100 test– baixou ata o 1,9%, dúas décimas superior ao da xornada anterior e un punto por baixo do 2,74% alcanzado o venres.
VÍTIMAS E CURADOS
Pola súa banda, as persoas falecidas diagnosticadas con Covid-19 desde o inicio desta pandemia en toda Galicia mantéñense en 2.652, ao non notificarse ningún óbito nas últimas 24 horas.
Fronte a iso, 180.116 persoas diagnosticadas deste coronavirus curáronse no conxunto da Comunidade galega desde o comezo desta crise sanitaria, 21 máis que as contabilizadas ata o día anterior.
