A Fundación Érguete-Integración e o grupo Clece asinaron este mércores un convenio de colaboración para impulsar a inserción socio-laboral de persoas en situación de vulnerabilidade, que contempla a realización de prácticas formativas non laborais e cursos de capacitación para facilitar a entrada desas persoas no mercado de traballo.

O acordo foi subscrito este mércores na sede de Érguete, en Vigo, pola presidenta da Fundación, Carmen Avendaño, e polo delegado en Galicia de Clece, Alberto Domínguez.

En virtude deste convenio traballarase por parte de ambas as entidades para facilitar a incorporación de persoas vulnerables en dúas das filiais de Clece: Samaín (encargada dos servizos de limpeza en centros comerciais e grandes superficies) e CleceVitam (especializada na xestión de residencias de maiores).

A Fundación comprométese a colaborar nos procesos de selección, e desenvolveranse prácticas formativas non laborais para estudar a inserción dos beneficiarios. Tamén se contempla a realización de cursos de capacitación.

Carmen Avendaño agradeceu a disposición de Clece para colaborar con Érguete-Integración e destacou que “é un gusto enorme poder dar unha oportunidade a quen a necesita, crer neles e que che devolvan a confianza”.

Pola súa banda, o delegado do grupo empresarial puxo en valor o traballo da Fundación e os seus equipos, despois de visitar as súas instalacións, e destacou que o labor que se fai cos usuarios para lograr a súa inserción.