A Consellería de Infraestruturas e Mobilidade urxiu ao Concello de Vigo a remisión da documentación municipal precisa para executar as obras para a mellora do saneamento do barrio de Teis, ás que destinará 1 millón de euros.
En concreto, explicou que o pasado venres remitiu un novo escrito a través de Augas de Galicia para requirir ao Concello o traslado da documentación “o máis axiña posible”. Así, resaltou que esta foi a cuarta vez que solicita o seu envío, tras os escritos dirixidos ao Consistorio entre outubro de 2020 e setembro de 2021.
Ademais, indicou que o Concello debe achegar o certificado do pleno de conformidade co proxecto de mellora do sistema de saneamento de Teis, de acordo co compromiso adquirido nun convenio asinado en outubro de 2020. Tamén concretou que debe remitir o seu compromiso de recibir as obras e, como titular das mesmas, asumir a súa posta en servizo, o seu mantemento e a súa explotación.
A Consellería tamén resaltou que debe trasladar a certificación da posta a disposición dos terreos precisos para executar a actuación, sen cargas e gravames e co réxime urbanístico adecuado. Adicionalmente, apuntou que o Concello debe enviar a certificación acreditativa do resultado do proceso de información pública do proxecto e a contestación ás alegacións, no caso de que se presentasen.
Así as cousas, advertiu de que, se a Administración local non traslada a documentación municipal necesaria o máis axiña posible, “existe o risco de que o convenio asinado finalice a súa vixencia”, asinada ata o 31 de decembro. Nese caso, afirmou que non se poderían levar a cabo as obras da primeira fase da mellora do saneamento.
CONTRATACIÓN E EXECUCIÓN DE OBRAS
A Xunta lembrou que se comprometeu a contratar e executar as obras, así como a asumir o custo das actuacións, que serán financiadas con Fondos Feder 2014-2020, polo que deben concluírse antes de finais de 2023.
Deste xeito, búscase solucionar as deficiencias que presenta o sistema de saneamento de Teis, ao acabar con filtracións que sobrecargan a rede para mellorar a calidade da auga costeira na contorna da depuradora.
