InicioPolíticaGonzalo Caballero presume do apoio que Vigo deu ao PSdeG nas autonómicas,...

Gonzalo Caballero presume do apoio que Vigo deu ao PSdeG nas autonómicas, fronte ao “retroceso” na provincia coruñesa

Critica veladamente o outro candidato a liderar o partido, Valentín González Formoso, secretario xeral do PSOE coruñés. No acto estivo ausente o seu tío Abel Caballero.

PUBLICADO O

O secretario xeral do PSdeG e candidato ás primarias para revalidar o liderado dos socialistas galegos, Gonzalo Caballero, reivindicou este venres o apoio que Vigo, a súa cidade, deu ao partido nas pasadas eleccións autonómicas, fronte ao “retroceso en votos e en escanos” que o PSdeG sufriu na provincia da Coruña.

Así, durante a súa intervención ante a militancia que se deu cita no Hotel Cidade de Vigo, Gonzalo Caballero trasladou outra crítica directa ao seu rival neste proceso de primarias, xa que Valentín González Formoso, ademais de optar a arrebatarlle a secretaría xeral do partido, é secretario provincial do PSdeG na Coruña.

Segundo apuntou Caballero, cos datos obtidos na cidade olívica en 2020 (un 31,9 % dos apoios), “hoxe non habería un presidente da Xunta do PP”, senón un socialista, e presumiu de que o PSdeG conseguiu en Vigo “o mellor resultado en autonómicas”, mentres que, na provincia da Coruña, “houbo un retroceso en votos e escanos para o Partido Socialista”.

“Entón, que modelo queremos para o futuro do PSdeG?”, cuestionou, á vez que pediu o apoio da militancia viguesa á súa candidatura nestas primarias, porque o seu proxecto “é a garantía para seguir fortalecendo o partido e volver conseguir resultados históricos nas municipais e xenerais de 2023”.

SER “ALTERNATIVA” OO VOLVER AO “PASADO CÓMODO PARA FEIJÓO”

As críticas máis ou menos veladas ao seu opoñente non quedaron aí, senón que o candidato a revalidar a secretaría xeral volveu contrapor o seu proxecto “gañador”, que pretende impulsar o partido “pola esquerda” e ser a “alternativa” en Galicia, con aquel que supón “un regreso ao pasado cómodo para Feijóo”.

“Gañar dentro, coa forza da militancia, para gañar fóra, coa cidadanía que espera de nós a mellor alternativa galeguista, feminista, ecoloxista, de esquerdas e cun claro compromiso ético”, proclamou, e apelou á “rebeldía” desa militancia que é a que decide: “Como cando gañou Borrell, Pedro (Sánchez) ou eu mesmo, hai catro anos”.

O acto coa militancia viguesa celebrouse no Hotel Cidade de Vigo, coa destacada ausencia do alcalde da cidade (e tío do candidato), Abel Caballero. De feito, este mesmo venres o rexedor escusou a súa ausencia alegando problemas de axenda e lembrando: “O meu tempo é limitado e teño que levar adiante unha cidade”.

No entanto, aclarou que xa coñecía os proxectos, tanto do seu sobriño como de González Formoso, ao que tampouco prevé acompañar en ningún acto.

Na presentación da candidatura de Caballero este venres tampouco estiveron nin a presidenta da Deputación, Carmela Silva, nin o secretario provincial do PSdeG en Pontevedra, David Regades, nin o secretario da agrupación local, Abel Losada.

ÚLTIMAS

Sindicatos chaman aos vigueses a manifestarse o sábado por un transporte público digno ante o “abandono” municipal

Os responsables comarcais dos sindicatos CIG, CC.OO., UGT e USO fixeron este xoves un...

O V Simposio Nacional de Oncoloxía de Precisión aborda en Vigo retos como a IA ou o uso de anticorpos biespecíficos

A cidade de Vigo acolle este xoves e este venres o V Simposio Nacional de...

Acepta unha multa de 2.280 euros por manosear e bicar a unha camareira sen o seu consentimento

O acusado de manosear e bicar a unha camareira sen o seu consentimento aceptou...

Detido un veciño de Porriño tras atacar cunha pedra a unha muller para roubarlle o bolso

Un home de 25 anos veciño do Porriño foi detido acusado dun delito de...