Axentes da Policía Local de Vigo identificaron nas últimas horas a tres persoas que foron sorprendidas en dous areais da cidade extraendo ameixa de forma ilegal.

Así, a primeira intervención tivo lugar na mañá do xoves, cando unha dotación que estaba a realizar labores de vixilancia en prevención do furtivismo foi requirida polo garda rural da confraría para acudir á praia de Bouzas, onde foran avistados dous homes recollendo ameixa.

Ao chegar os policías, un dos ‘furtivos’ deuse á fuga, aínda que os axentes lograron intervirlle unha aixada e unha bolsa con ameixas, que foron devoltas ao seu hábitat.

A outra persoa, L.A.M.S., de 55 anos de idade, foi identificada e explicou aos axentes que descoñecía a prohibición de extracción deste bivalvo. O home foi apercibido e as capturas devoltas ao mar.

Este mesmo xoves, pouco antes da media noite, o vixiante da confraría solicitou presenza do 092 ao sorprender a dous homes na Baixada a Ríos, mariscando de forma ilegal.

Os axentes identificaron aos ‘furtivos’, C.C.B, de Italia e de 50 anos de idade, e R.L.S., de Vigo e de 49 anos, aos que lles interviñeron máis de 5 quilos de ameixa japónica e babosa. O marisco foi devolto ao mar e os homes foron propostos para sanción.