A suspensión da quenda de fin de semana do sistema M2, que monta as furgonetas e monovolúmenes, da planta de Stellantis (antes PSA Peugeot Citroën) en Vigo suporá a recolocación duns 650 empregados, mentres que outro centenar desa quenda chega ao final do seu contrato e non se lles renovará.

Así se trasladou na reunión mantida este luns entre a empresa e os representantes sindicais para abordar a eliminación “temporal” desta quenda de traballo (tamén chamado ‘cuarto equipo’) da M2, debido aos problemas de aprovisionamento derivados da crise dos microchips.

A factoría viguesa anunciou hai unha semana a suspensión desta quenda de fin de semana e este luns iniciáronse as negociacións para acordar cando e con que medidas se vai formalizar esa suspensión.

A empresa expuxo que a eliminación desa quenda se faga efectiva a partir do 3 de outubro, é dicir, que ese será o último día “programable” de actividade para ese equipo. A dirección de Stellantis Vigo sinalou que esa medida permitirá “axilizar mobilidades e formacións” de cara a reacomodar actividade e emprego.

A nova situación afecta a uns 750 operarios, dos que uns 650 pasarán a outros sistemas e quendas. Segundo a proposta trasladada pola empresa, 100 empregados finalizan contrato, outros 200 pasarían ás quendas da semana da M2, e outros 450 serían recolocados na M1 (tanto pola semana como o fin de semana).

Estes movementos son compensados en gran medida porque hai outros 600 empregados (de ambos os sistemas e de varias quendas) que finalizan o seu contrato e tampouco renovarán. En todo caso, os traballadores eventuais que sexan acomodados noutros postos iran marchando tamén a medida que finalicen “de forma natural” os seus contratos.

Os sindicatos estudarán a proposta da empresa e farán as súas propias, que se abordarán nunha reunión o vindeiro mércores.

A suspensión desta quenda de traballo enmárcase dentro das medidas adoptadas pola factoría viguesa para facer fronte á ‘crise dos microchips’, que derivou en importantes problemas de aprovisionamento e obrigou á fábrica a suspender a súa actividade (total ou parcialmente) de maneira periódica nos últimos meses.