O Pleno da Corporación de Vigo aprobou este mércores unha moción do grupo socialista na que se insta á Xunta de Galicia a utilizar fondos propios (na mesma proporción que o Goberno de España) e parte dos fondos de reconstrución procedentes da UE para financiar o pasivo do estaleiro Barreras, condicionando esta achega de diñeiro público e con supervisión do mesmo.
A iniciativa foi aprobada cos votos favorables de todos os grupos municipais, salvo o PP que se abstivo, e contempla tamén instar ao Igape a cooperar a través dos seus programas de internacionalización para buscar contratos para a empresa.
Así mesmo, a moción inclúe solicitar á Xunta que desenvolva un plan estratéxico para o sector naval privado, similar ao configurado en torno ao Polo Aeronáutico de Rozas.
INTERVENCIÓNS DOS GRUPOS
O concelleiro socialista Abel Losada, encargado de defender a moción, lembrou que a Xunta ten “en exclusiva” as competencias sobre a política industrial e que o seu papel en Barreras foi anunciar uns contratos de Pemex que nunca se materializaron.
Por iso, tendo en conta isto, reclamou que a administración autonómica “financie ou axude a financiar” o pasivo do estaleiro, e lembrou que a Xunta recibiu máis de 1.000 millóns de euros de fondos Covid procedentes do Goberno central e da UE. “Non é desatinado”, apuntou.
O portavoz de Marea de Vigo, Rubén Pérez Correa, sinalou que, ademais da “mala xestión” de José García Costas na empresa, “algo tivo que ver” o proceso de reconversión auspiciado no seu día polo PSOE na deterioración do sector. Segundo proclamou, á marxe da Xunta, “a SEPI ten que actuar directamente para que haxa unha rede pública de estaleiros no Estado”, aínda que matizou que “mentres Barreras teña débedas cos seus provedores, nin un euro de diñeiro público”.
Pola súa banda, o edil do BNG, Xabier Pérez Igrexas, lamentou que esta iniciativa do grupo de goberno local chegue “cando Barreras xa está paralizada, con case todo o persoal en ERTE e en risco de liquidación e desaparición”. O concelleiro nacionalista pediu que se fiscalice o diñeiro público que se dea ao estaleiro, que haxa unha intervención pública, e que se convoque o Consello Social para dar unha “resposta de cidade” a esta crise.
Mentres, a concelleira do PP, Teresa Egerique, criticou a “demagoxia” do grupo socialista, ao que lembrou que o PSdeG se abstivo nunha votación no Parlamento autonómico sobre o uso de fondos Covid na recuperación do naval.
Egerique defendeu que o sector en Galicia é “potente”, aínda que recoñeceu o “problema grave” de Barreras, e lembrou que o Igape está a financiar ás auxiliares do naval, que conta co apoio da Xunta. “Compórtanse como marionetas, concelleiras de papel que fan os discursos que lles manda Abel Caballero, e usan as súas mocións para dicir que Feijóo é o malo da película”, criticou.
OUTRAS MOCIÓNS
Por outra banda, a corporación aprobou tamén unha moción de Marea de Vigo (co voto de todos os grupos, excepto a abstención do PSOE) para articular de urxencia políticas para conter o prezo do aluguer en Vigo e aumentar o parque de vivenda dispoñible, así como a xestión directa municipal do futuro ‘stock’ de vivenda pública.
Tamén se deu luz verde (co voto contrario do PP e a abstención de Marea) á petición de que a Xunta ceda ao Concello 14 locais do Consorcio do Casco Vello por un prazo dunha década; e aprobouse unha moción (co único voto favorable dos socialistas) para pedir ao goberno galego que destine o mesmo diñeiro que Concello e Deputación á promoción de rutas aéreas no aeroporto a cidade.
Con todo, foi rexeitada a moción do PP para reclamar a exposición do novo Plan Xeral en varias sedes e facilitar a presentación de alegacións. Neste caso, os populares só contaron co apoio do BNG, mentres que Marea abstívose e o PSOE votou en contra.
