O Consello da Xunta deu este xoves luz verde ao decreto polo que se declara a utilidade pública e disponse a urxente ocupación dos terreos necesarios para executar as obras de mellora da seguridade viaria na PO-330, ao seu paso por Valadares e Pereiró, no Concello de Vigo.

O investimento que o Goberno galego destinará a esta actuación é de case 1,85 millóns de euros, nos cales se inclúe o pago dos 36 predios necesarios para a súa execución.

Esta intervención, conforme indicou a Xunta, ten como obxectivo desenvolver un conxunto de actuacións integrais ao longo de case 7 quilómetros da vía autonómica na procura do reforzo da seguridade viaria e a mellora da accesibilidade nestes núcleos para evitar un tramo de concentración de accidentes.

A Consellería de Infraestruturas e Mobilidade convocará o levantamento das actas previas no cuarto trimestre do ano, coa previsión de licitar e executar as obras no ano 2022. Os traballos contan cun prazo de execución de dez meses.