Os Bombeiros de Vigo excarceraron ao condutor dun camión que resultou ferido tras quedar atrapado no interior do camión, segundo informa o servizo de emerxencias 112. Ao redor das 11,00 horas deste luns, un particular avisaba dun camión de obra envorcado despois de saírse da vía na VG-20, á altura de Beade, dirección Baiona, no concello de Vigo.
No seu relato, advertía de que o condutor podía estar atrapado no interior do vehículo. O 112 Galicia puxo os feitos en coñecemento do Servizo de Urxencias Sanitarias de Galicia-061 e dos bombeiros.
Así mesmo, foron informados os axentes de Tráfico, da Policía Local, os efectivos de Protección Civil e o persoal do servizo de mantemento da autovía. Unha vez no punto e tras ser liberado, os servizos sanitarios confirmaron o seu traslado ao centro hospitalario.