O Concello de Vigo desenvolverá un polígono de vivenda protexida na parcela que actualmente ocupa o parque central de servizos municipais de Santa Cristina de Lavadores, segundo anunciou en rolda de prensa o alcalde, Abel Caballero, aínda que non precisou cantas vivendas poderán construírse nesa zona.
O rexedor volveu a defender o “compromiso” do goberno local coa vivenda protexida, ratificado no novo Plan Xeral de Ordenación Municipal (PXOM), que será aprobado inicialmente en pleno antes de que acabe agosto.
Segundo subliñou, o novo plan proxecta 50.000 vivendas, das que 14.500 (un 29 %) terán algún tipo de protección. Tamén explicou que hai cinco ámbitos de novos desenvolvementos residenciais nos que a porcentaxe de vivenda protexida será de entre o 90 e o 100 %.
Respecto diso, apuntou que, en Vigo, hai unhas 5.000 persoas inscritas como demandantes de vivenda pública, aínda que dita demanda pode ser superior en realidade, porque moita xente “desiste, se desanima ao ver que a Xunta non fixo nada en 12 anos”. A novo PXOM, recalcou, daría resposta a esta demanda, e avanzou que a Zona Franca tamén se implicará no impulso da vivenda protexida na cidade.
No caso da actuación de Santa Cristina de Lavadores, explicou que será o propio Concello o que desenvolva as vivendas protexidas e que as instalacións municipais que actualmente están alí trasladaranse á parcela da antiga Afamsa, en Severino Cobas. “E non descarto outros polígonos noutras zonas”, engadiu, á vez que confirmou que a intención do goberno municipal é estudar o financiamento desta operación con cargo a fondos europeos Next Generation.