A Xunta celebrou que o goberno local de Vigo asumise o proxecto de remodelación das pistas de atletismo de Balaídos tras “8 anos de atraso”.

Así se pronunciou despois de que o alcalde da urbe olívica, Abel Caballero, anunciase o encargo do proxecto e denunciase que o Goberno galego destinou “0 euros” ao acondicionamento do complexo a pesar de que “prometeu 5 millóns de euros” para este fin.

Pola súa banda, o secretario xeral para o Deporte, José Ramón Lete Lasa, lembrou que a Xunta e o Concello acordaron en 2013 destinar 2,3 millóns de euros e 400.000 euros, respectivamente, á reforma das pistas de Balaídos. Así, sinalou que, desde esa data, o Goberno galego “leva oito anos reservando nos seus orzamentos unha partida para comezar canto antes as obras nas pistas” e “esperando a decisión do Concello para poder executalas”.

Neste sentido, explicou que, tras a anulación do plan de urbanismo de 2008 por sentenza xudicial, “foi en todo momento o Concello o que debía realizar as modificacións urbanísticas pertinentes para poder comezar a obra”. No entanto, indicou que a Xunta “citou ao Concello en catro ocasiones para manter unha reunión” e convocou un encontro co tecido deportivo do atletismo vigués “sen obter resposta algunha” do goberno local.

En todo caso, o Executivo autonómico reivindicou a vixencia do seu compromiso. Tamén ofreceu ao Concello o proxecto de reforma do complexo de atletismo de Balaídos que encargou e sufragou a Xunta e que posúe desde 2015, ademais de mostrar a súa disposición a reunirse co goberno local para abordar a proposta definitiva.

Adicionalmente, sinalou que as cartas remitidas polo Concello á Secretaría Xeral para o Deporte indican que a primeira institución espera que a Xunta “deposite 5 millóns de euros para a reforma do Estadio de Balaídos, obra prioritaria para Galicia”, pero “sen aludir en ningún momento” ás pistas de atletismo.