O Consello de Contas arquivou unha denuncia de CC.OO., CUT e CIG por posibles “irregularidades” no destino de fondos con orixe nunha contribución especial polo establecemento e a mellora do servizo de extinción de incendios de Vigo.
En concreto, os denunciantes pediron a incoación dun expediente informativo ao Concello para “dilucidar o destino dos ingresos recadados en concepto de contribucións especiais” da xestora de concertos para a contribución ao servizo de extinción de incendios de Vigo, antes Unespa. Ademais, solicitaron que se ordenase a instrución dun procedemento de responsabilidade contable se se constataba algunha “irregularidade”.
No entanto, a comunicación foi arquivada debido a que “os feitos citados na denuncia están suxeitos á interpretación do denunciante e non están sostidos por ningún medio que acredite a súa veracidade”. Así mesmo, o Consello de Constas remarca que non procede realizar ningunha actuación no marco das súas competencias, que “en ningún caso inclúen incoar un expediente informativo nin ordenar a instrución dun procedemento de responsabilidade contable con carácter sancionador”.
Noutra comunicación, os sindicatos advertiron de “unha posible responsabilidade por alcance contable” con causa nos pagos derivados da regulación municipal das xornadas de reforzo dos bombeiros retribuídas como gratificaciones por servizos extraordinarios por falta de probas.
Con todo, o Consello de Contas sinala que “non se poden apreciar indicios de responsabilidade contable por alcance ou malversación de caudais públicos” e indica que “non queda acreditado por ningún medio a realización de pagos de cantidade algunha que poidan ser cualificados como ‘prexuízo patrimonial real e efectivo'”.
Así, o pleno acordou arquivar a comunicación presentada polos sindicatos “por non entenderse suficientemente sostidos os feitos denunciados” dado que, segundo resalta, non están apoiados “por ningún medio que acredite a súa veracidade”. Ademais, remarca que as competencias do Consello de Contas “en ningún caso inclúen incoar a instrución dun procedemento de responsabilidade contable”.
Pola súa banda, o alcalde de Vigo, Abel Caballero, asegurou que estas resolucións representan un “pau” para as centrais. Así se preguntou “que van facer estes responsables sindicais”, se “van dimitir” ou a “seguir dando a lata e dicindo mentiras e calumnias”.
Traballadores do servizo e o Concello mantiveron un conflito durante meses que en agosto de 2019 chegou a ocasionar o inicio dunha folga que permaneceu vixente durante ano e medio. O pasado mes de febreiro, o comité de folga, conformado por CIG, CC.OO. e CUT, desconvocouna “en xesto de boa vontade”, aínda que asegurou que continuaría a reivindicación de “melloras para o servizo”. Posteriormente, o pasado mes de abril, o Concello retirou o decreto que obrigaba a traballar aos efectivos en días libres.
