A presión hospitalaria que deixa a pandemia da covid-19 en Galicia volveu a subir nas últimas horas ata os 48 ingresados en total, seis máis, mentres que tamén ascenderon os casos activos por coronavirus ata os 1.451, 48 máis. Os contaxios detectados nun só día por calquera tipo de proba baixaron ata os 126. A pesar do descenso, mantéñense por encima do centenar debido, principalmente, aos brotes vinculados ás viaxes estudantís a Mallorca, que deixan polo menos 70 infeccións en Galicia

Así se extrae dos datos publicados na mañá deste domingo pola Consellería de Sanidade con rexistros ata as 18,00 horas deste sábado, recollidos por Europa Press. Por áreas sanitarias, na de Vigo só hai un paciente ingresado na UCI.

MÁIS CASOS ACTIVOS

En canto aos casos activos de covid-19, crecen por cuarta xornada consecutiva a 1.451 en Galicia, que implican 38 máis que o día anterior, ao rexistrarse de novo máis contaxios que altas en 24 horas. Iso si, mantéñense en niveis de mediados de agosto do ano pasado. Por áreas sanitarias, o ascenso replicouse en cinco das sete que hai en Galicia, entre elas, a de Vigo, con 209 (+6).

NOVOS CONTAXIOS

Pola súa banda, os novos contaxios de covid-19 detectados con calquera tipo de proba descenderon ata os 126 tras os 136 notificados por Sanidade o sábado e os 154 do venres. De todos os 126 novos casos, a de Vigo acumula 22.