O grupo municipal do PP no Concello de Vigo presentará unha moción para o seu debate no pleno do próximo mércores, na que insta o goberno local e ao goberno central a mellorar os accesos ao Instituto Feiral de Vigo, así como a reforzar o transporte público ao recinto.

Segundo explicaron en rolda de prensa o portavoz do grupo, Alfonso Marnotes, e os edís Teresa Egerique e Jesús Marco, a Xunta e o Executivo central do PP investiron nos últimos anos uns 20 millóns de euros en ampliar o recinto feiral ou mellorar a súa conexión peonil cunha pasarela que o comunica co aparcadoiro do aeroporto.

Por contra, denunciou Egerique, tanto o goberno local de Abel Caballero como o de Pedro Sánchez manteñen unha actitude de “abandono” con respecto ao Ifevi, e os atascos nas inmediacións do recinto son unha constante cada vez que hai unha feira multitudinaria ou un evento como a campaña masiva de vacinación contra a Covid-19.

O concelleiro Jesús Marco recalcou que o Concello debe actuar na Avenida do Tranvía, que é de titularidade municipal, e aumentar os carrís entre a saída da autoestrada e a rotonda que hai fronte ao aeroporto, porque agora “é a Policía Local a que está a salvar o deixamento de 14 anos do alcalde”.

Finalmente, o portavoz do grupo, Alfonso Marnotes, urxiu ao goberno local a que poña en marcha lanzadeiras desde diferentes puntos da cidade para conectar co Ifevi, xa que a única liña de bus urbano que leva ata o recinto actualmente ten unhas 15 paradas e unha frecuencia de paso de 30 minutos. “O Ifevi foi concibido para eventos multitudinarios, pero ten que estar acompañado por melloras nos accesos e reforzo do transporte público”, resolveu.