A Xunta remitiu este mércores ao Concello de Vigo o proxecto de urbanización da fase 1 de San Paio de Navia, tras o que solicitou do Goberno vigués o seu “compromiso e responsabilidade” cos trámites a realizar, de forma que “os priorice o máximo posible” e “evite demoras innecesarias”.

Nunha rolda de prensa, a conselleira de Medio Ambiente, Territorio e Vivenda, Ángeles Vázquez, manifestou que a Administración local agora debe proceder á aprobación inicial, sometemento a exposición pública durante un mes e pedir informes sectoriais, “se é necesario”, antes de proceder á aprobación definitiva. O obxectivo da Xunta, dixo, é iniciar a licitación das obras en xullo.

A conselleira lembrou que, de acordo coa Lei do chan de Galicia, a aprobación definitiva do proxecto debe facerse nun prazo de tres meses desde que finaliza a exposición pública e recíbense os informes sectoriais. Se non se emite resolución, o proxecto queda aprobado por silencio administrativo.

Neste marco, manifestou que durante a elaboración do proxecto “houbo boa interrelación entre o equipo redactor e os técnicos do Concello”, polo que considerou que “non debería haber ningún problema para cumprir os prazos e que non houbese demora”.

Vázquez remarcou que o custo da nova urbanización, que terá en total 1.600 vivendas, superará os 25 millóns de euros, dos que 11 millóns corresponden á fase 1. Este primeiro polígono contará con 735 vivendas, unha zona verde de 10.800 metros cadrados e 440 aparcadoiros.

Neste ámbito, eloxiou este “proxecto integrador, sustentable, verde, que está aliñado totalmente coas directrices e estratexias do Goberno galego”. “É un barrio que vai ser un exemplo para toda Galicia”, subliñou, insistindo en que con esta iniciativa a Xunta “está a cumprir con Vigo e cos vigueses”.

O PROXECTO

Tal e como trasladou a técnica do proxecto Lorena Pardiñas durante a rolda de prensa deste mércores, o proxecto de urbanización de San Paio de Navia contempla a construción de 1.6000 vivendas nunha superficie de case 27 hectáreas. Debido á magnitude do proxecto, as obras realizaranse en tres fases.

Ademais das vivendas, o proxecto conta cun completo sistema viario, 1.200 prazas de aparcadoiro, 24.000 metros cadrados de equipamentos e 23.000 metros cadrados de zonas verdes –nas que se integrarán as masas arbóreas con especies autóctonas que hai agora na contorna e recolocaranse dous hórreos–.

Tamén inclúe 900 metros cadrados de parques infantís e áreas de xogo e exercicio, un carril bici de 2 quilómetros e unha gran área comercial –que se sumará aos locais comerciais que irán situados nos baixos dos edificios–.