O docente e investigador da Universidade de Vigo (UVigo) Albino Prada publicou o libro ‘Riqueza nacional e benestar social. Máis desenvolvemento con menos crecemento’, no que apunta que recuperar un 5 por cento o PIB en España tras a crise polo covid-19 chegaría, “a condición de que ese crecemento se transforme en benestar social”.

Segundo a universidade viguesa, o investigador sinalou que a crise económica actual, provocada pola pandemia, trouxo “un colapso económico importante e unha caída dun 11 por cento do PIB”. No entanto, considera que “o máis sintomático e preocupante” da actual crise “é que practicamente todo o mundo querería recuperar eses puntos do PIB e, se fose posible, todos dun golpe”.

“Xa nin sequera parece un éxito crecer ao redor dun 6 por cento, que é onde se sitúan as últimas previsións do Goberno”, lamentou, insistindo en que “chegaría con crecer ao 5 por cento, a condición de que ese crecemento se transforme en benestar social”. “De que nos serve crecer ao 10 ou 15 por cento se o nivel de benestar social empeora?”, cuestionou.

Neste sentido, remarcou que “non se trata de emular aos máis ricos, senón a algúns menos ricos que alcanzaron logros de desenvolvemento semellantes”, a colación do que defendeu que unha educación e sanidade universais e públicas é “algo clave para o benestar e estabilidade da poboación a escala mundial”.

Prada tamén fai referencia no libro á crise económica de 2008, da que “España saíu relativamente ben, na medida en que foi quen de ir recuperando o PIB a un ritmo moi notable”, aínda que admitiu que foi “perdendo polo camiño moitas posicións en benestar social”.

RIQUEZA E BENESTAR

Segundo informou a universidade viguesa, o libro ‘Riqueza nacional e benestar social. Máis desenvolvemento con menos crecemento’ representa “unha folla de ruta válida a escala mundial” acerca de que nivel de crecemento económico é compatible coa sustentabilidade global do planeta e o benestar dos seus habitantes.

Este ensaio, que conta cunha linguaxe “moi accesible”, recompila o traballo de investigación realizado no últimos sete anos por Prada en colaboración co tamén investigador da UVigo Patricio Sánchez.

A partir destes estudos, comprobaron que determinados países ou rexións, tendo un nivel relativamente alto ou alto en riqueza, baixaban moitos postos se o que se medía era o benestar social; e viceversa, rexións que, cunha riqueza máis modesta, conseguían niveis moito maiores de benestar social”.