O persoal da concesionaria que se encarga do mantemento das zonas verdes en Vigo está chamada á folga indefinida a partir do próximo luns 19 de abril, como medida de protesta polos “incumprimentos” en materia laboral e salarial, segundo informou o sindicato CIG.
A central nacionalista sinalou, nun comunicado, que a “práctica totalidade” do persoal decidiu a convocatoria de folga nunha asemblea celebrada o pasado venres, para denunciar as supostas irregularidades da UTE concesionaria (Acciona Medio Ambiente-Mantén), uns problemas que tamén lles trasladaron aos responsables municipais.
Segundo apuntou a Federación de Servizos da CIG, a empresa está a incumprir o prego de condicións, que lle obriga a contratar a máis persoas a tempo completo, xa que “só se fixeron contratos parciais de tres días e de 15 horas”.
Ademais, denunciou, tampouco está a pagar o plus de 20 euros ao mes e non respectou o convenio no relativo ás liquidacións, xa que a anterior concesionaria pagou á actual a liquidación conxunta dos traballadores, en lugar de facelo individualmente para que estes non as visen reducidas.
Finalmente, tamén acusou á UTE de modificar os horarios do persoal “sen previo aviso e sen negociación”, utilizando a pandemia de COVID como escusa para cambiar quendas e establecer horarios de inverno e de verán, que non están recollidos no convenio. Así, advertiron de que este cambio de horarios “á carta” vulnera o dereito de conciliación de todo o persoal.
