O xulgado do Contencioso Administrativo número 2 de Vigo ditou un auto polo que desestima un recurso interposto pola Federación de Asociacións Veciñais de Vigo (FAVEC), contra a decisión do goberno local de desaloxalos da súa sede nun edificio da Praza da Princesa.

Así, en decembro do ano pasado, o goberno local acordou suspender temporalmente (por 13 meses) a cesión do dereito de uso da segunda planta do edificio situado no número 7 da Praza da Princesa, onde tamén teñen a súa sede outras entidades, entre elas, a Oficina de Rehabilitación ou unha unidade de acción social municipal.

A Federación Veciñal acudiu aos tribunais para reclamar que se paralizase ese desaloxo polos “graves prexuízos de difícil ou imposible reparación” que tería para a entidade ou que, subsidiariamente, se lle busque un local alternativo para reacollerse.

O xulgado desestimou esta pretensión porque, por unha banda, o Concello non resolve o convenio que ten coa FAVEC desde 2005, senón que o suspende temporalmente e, por outro, a entidade veciñal está en situación de “debilidade xurídica” fronte á administración que lle cede o local.

A iso engade que a sede é un elemento de dominio público e “o desaloxo non é caprichoso, nin súbito, senón que está amplamente motivado”, e responde ao mal estado no que se atopa o edificio, co risco que iso supón.

Por outra banda, o maxistrado tamén sinala que se están tramitando os expedientes para a regulación da cesión de locais públicos a entidades como a Federación e que, segundo alega o propio consistorio, “en situación similar á interesada existen case un cento de solicitudes anteriores para que o Concello ceda locais de maneira gratuíta”.

En todo caso, no auto o xuíz expón que o Concello informou da súa oferta dun local no Casco Vello para a FAVEC (unha oficina que, segundo a entidade veciñal é un “zulo” sen apenas espazo no que non poden desenvolver o seu labor). Contra este auto cabe recurso de apelación no prazo de 15 días.