Continúan as mobilizacións contra a implantación de proxectos eólicos amparada pola Xunta de Galicia. A plataforma Ecoloxistas en Acción, unha das máis activas nas reivindicacións contra o espallamento “descontrolado” dos muíños de vento, vén de dar un paso máis na defensa da que, consideran, é un dos espazos de maior ambiental de Galicia e que podería ser danado por diversos proxectos: a serra do Suído.

Segundo apuntan dende a plataforma, esta xa presentou alegacións aos proxectos eólicos P.E. Coto Redondo, proxectado entre Covelo e Fornelos de Montes, e P.E. Puza entre Avión e A Lama; ambos na serra do Suído. A organización ecoloxista subliña, a esta respecto, o seu rexeitamento a “calquera proxecto industrial que degrade máis esta zona de tan alto valor ecolóxico e cultural”.

Por esta razón veñen de instar á Xunta a estender a Rede Natura 2000 para que abranga toda a serra do Suído; unha circunstancia que, na práctica, poñería moitos atrancos á implantación deses proxectos eólicos en proceso de tramitación administrativa. A organización ecoloxista lembra, a este respecto, que a serra do Suído é “un dos principais espazos de media montaña da xeografía galega”, xa que conta cuns valores naturais e patrimoniais “excepcionais”, e que, ata o momento, se mantiveron “nun aceptábel estado de conservación”.

ENTORNO AMEAZADO

“Boa parte desta riqueza ecolóxica é resultado dos aproveitamentos agro-gandeiros tradicionais de montaña, sendo esta área un dos poucos exemplos que representan con maior pureza os elementos derivados desta transformación”, explican. Precisamente por este motivo, a serra do Suído é candidata a formar parte da rede Natura 2000 (LIC serra do Suído, ES1140017), tal e como se recolle na proposta de ampliación da Rede feita pública na sesión do Consello Galego de Medio Ambiente e Desenvolvemento Sostíbel, apuntan dende a plataforma.

A Xunta terá pois que decidir se amplía ou non a protección a esta zona de especial interese e beleza, unha circunstancia que, como foi sinalado, dificultaría en grande medida os proxectos eólicos deseñados pero que, en troques, axudaría a conservar o patrimonio natural e cultural da zona, que vai dende túmulos funerarios prehistóricos á presenza de turbeiras e especies animais ameazadas.