Aena aprobará na mañá deste luns, no seu comité de dirección, unha adenda ao convenio autorizado a semana pasada coa Xunta que permitirá a cesión de espazos para a realización de test de antíxenos de covid-19 nos aeroportos de Santiago e Vigo, como xa se fai no da Coruña. Unha vez asinada, a Administración galega poderá empezar de forma inmediata o proceso.

Segundo informaron fontes de Aena, a solicitude da Xunta para que o Sergas realice estes controis en Peinador e o Rosalía de Castro foi remitida ao xestor aeroportuario o pasado xoves, 25 de marzo, a media tarde, cando xa se aprobou o convenio relativo a Alvedro. Para darlle axilidade, incluíuse a adenda na seguinte reunión do comité de dirección, este luns.

Tal e como explicou Aena, no caso do aeroporto da Coruña –onde se realizan tests desde o pasado venres— o xestor aeroportuario remitiu á Xunta o borrador de convenio “a comezos de mes”, un documento similar ao que se utiliza noutras comunidades, como Baleares ou Canarias.

Con todo, prosegue Aena, “as autoridades galegas non responderon ata o martes 23 de marzo pola tarde, incluíndo diversas esixencias que superaban as competencias de Aena”. Finalmente, o mércores 24, a Xunta aceptou o texto inicialmente remitido por Aena e o xestor aeroportuario “completou a súa tramitación en horas”.

A solicitude para os aeroportos de Santiago e Vigo recibiuse o xoves 25 pola tarde, explica Aena, “coa tramitación do convenio inicial xa pechada”. Por iso, o mesmo venres procedeuse a identificar os espazos máis adecuados en cada un dos aeroportos e traballouse no texto dunha adenda ao convenio asinado o día anterior, que se aprobará este mesmo luns o en comité de dirección, un órgano que se reúne dúas veces por semana.