do grupo de Bioloxía Ambiental do Centro de Investigación Mariña da Universidade de Vigo (UVigo) descubriron dúas novas especies de hidrozoos en augas frías da costa oeste de África, concretamente a máis de 400 metros de profundidade en augas de Angola e Mauritania.
Segundo informou a universidade viguesa, este descubrimento foi publicado na revista científica ‘Deep-Sea Research Part I‘ nun artigo polo que se describen as características morfológicas e a distribución destas dúas novas especies.
En concreto, estes dous novos hidrozoos pertencen ao xénero ‘Rosalinda’, que ata agora contaba con catro especies. Así, o que foi atopado en Angola foi bautizado como ‘Rosalinda nowaldi’, mentres que o achado en Mauritania recibiu o nome de ‘Rosalinda lundavi’.
A investigadora Marta Gil, que neste estudo contou coa supervisación dos investigadores Fran Ramil e André Freiwald, destacou que cada unha das novas especies descubertas posúe un sistema de ancoraxe cunha forma característica, así como unha serie de cnematocistos –células urticantes– “moi específicos”.
Ademais, ambas as especies crecen sobre o mesmo xénero de bivalvo (‘Acesta’), aínda que cada unha crece sobre unha especie diferente de ‘Acesta’, o que demostra “unha asociación exclusiva entre as dúas especies de ‘Rosalinda’ e as de ‘Acesta’“.
Isto “é un factor importante a ter en conta á hora de promover plans de preservación e conservación da fauna”, remarcou a investigadora principal deste proxecto, cuxos resultados son froito das campañas oceanográficas realizadas en 2010 e 2016 en augas africanas.
No transcurso da investigación, as mostras foron recollidas con vehículos operados remotamente –equipados con varias cámaras e brazos articulados para a toma de mostras no fondo mariño–. Estes vehículos foron operados por Nicolas Nowald e Tomas Lundälv, que deron nome ás novas especies.
OUTROS DESCUBRIMENTOS
Marta Gil e Fran Ramil tamén publicaron recentemente outro estudo na revista ‘Zootaxa’, polo que fan referencia a dúas especies novas achadas en campañas desenvolvidas en 2009 e 2010 en Mauritania. Trátase da ‘Nemertesia freiwaldi’ e a ‘Nemertesia caboverdensis’.
De acordo con este estudo, “a riqueza de especies de hidrozoos nos arrecifes de coral das augas frías de Mauritania é menor que a observada nos fondos adxacentes, pero comparable á doutros arrecifes de coral do Atlántico nororiental”.
No transcurso desta investigación identificáronse en total 35 especies, 26 xéneros e 16 familias, das cales 33 especies crecían nos arrecifes de coral das augas frías africanas.
