O alcalde de Vigo, Abel Caballero, confirmou este martes a súa intención de trasladar a Escola Infantil Municipal Santa Marta ao edificio do Instituto Municipal de Educación, no Chouzo, actualmente ocupado por un centro de formación de profesorado da Xunta de Galicia e pola Federación Olívica de Anpas (Foanpas).
Caballero volveu, ademais, arremeter contra a Xunta por oporse a situar esa escola no CEIP Ramón y Cajal.
Segundo explicou, o Concello xa trasladou á administración autonómica que necesitará ese espazo, que agora ocupa un centro de formación de profesorado para que a Xunta “busque outro lugar”.
O rexedor, no entanto, non aclarou se o traslado da escola infantil suporá tamén o desaloxo do espazo que utiliza Foanpas, unha organización que é moi crítica co goberno local por prever o peche da escola “sen unha alternativa” para as familias e que, de feito, convocou varias concentracións de protesta.
