Efectivos de Bombeiros apagaron un incendio declarado nun vehículo estacionado no interior dunha nave de Vigo. Como resultado, catro persoas tiveron que ser atendidas por inhalación de fume e producíronse danos valorados en 800.000 euros. Segundo informou a Policía Local da cidade olívica, sobre as 14:00 horas deste mércores recibiuse un aviso por un incendio nun vehículo aparcado nun taller situado dentro dunha nave da avenida Ricardo Mella.

Ata o lugar desprazáronse varias unidades policiais, así como dúas dotacións de Bombeiros de Balaídos, que comezaron os labores de extinción das chamas. Ademais, acudiron dúas ambulancias, que asistiron a catro empregados do taller por unha leve intoxicación por fume.

O xerente do establecemento trasladou aos axentes que o lume se orixinou na zona do taller, concretamente nun turismo no que estaba a traballar un operario. Así, produciuse unha pequena explosión tras a que se desencadearon as chamas. O traballador, xunto con outro compañeiro, tratou de apagar o lume cun extintor pero non foi capaz debido ao denso fume concentrado, polo que se procedeu a evacuar a nave.

No taller había nese momento un total de 10 vehículos, dos que catro –de alta gama– se viron afectados o lume. En total, nunha primeira estimación valoráronse os danos nuns 800.000 euros.