Axentes da Policía Local de Vigo detiveron a unha parella por agredirse mutuamente durante unha discusión que se iniciou no seu domicilio e que continuou no portal do edificio, na rúa Venezuela.

Segundo informaron fontes policiais, os axentes acudiron ao lugar despois de recibir unha chamada alertando dunha violenta discusión no portal dun inmoble.

Ao chegar, os axentes observaron a un home e unha muller que estaban a discutir. Ela, A.J.G, de 40 anos de idade, explicou que discutira coa súa parella e que este lle suxeitou fortemente do pescozo e tapoulle a boca para que non gritase, asegurando que eses episodios agresivos se repetían con frecuencia.

A continuación, o home, T.G.P., de 34 anos de idade, fixo a maleta con intención de irse do domicilio. A muller seguiuno e continuaron discutindo no portal, onde ambos pelexaron (a declarante presentaba lesións no pescozo e erosións nunha man).

Pola súa banda, o home explicou que, efectivamente, tiveran unha discusión “por un episodio de ciumes” e que a muller o suxeitou a el violentamente polo pescozo, producíndolle rabuñaduras, que mostrou aos axentes.

Segundo sinalou, ese tipo de agresións por parte da súa parella eran habituais cando discutían, pero nunca a denunciou. De feito, mostrou aos policías unha queimadura nunha perna, segundo relatou, debido a que a muller lle botou encima auga fervendo durante unha das súas pelexas.

Ante esta situación, os axentes detiveron ao home, como presunto autor dun delito de violencia de xénero, e tamén á muller, como presunta autora dun delito de violencia no ámbito familiar.