Axentes da Garda Civil interceptaron a un vigués que levaba no coche case 2.000 máscaras de procedencia ilegal e sen a preceptiva homologación, as cales supostamente prevía vender a farmacias sen ter a licenza de venda e distribución pertinente.
Segundo informou o Instituto Armado, tras darlle o alto ao condutor no transcurso dun control de estrada no termo municipal de Vilaboa, localizáronse no maleteiro do vehículo un total de 160 paquetes de máscaras “ilegais”.
En concreto, os paquetes contiñan 1.895 máscaras de protección de distintos tipos, que carecían tanto da preceptiva homologación como da documentación que legalizase a súa tenencia e comercialización, as cales presuntamente pretendía vender en distintas farmacias da provincia.
O home, veciño de Vigo, alegou que compraba as máscaras a través de Internet e despois as empaquetaba no seu domicilio antes de distribuílas, normalmente en farmacias.
Ante estes feitos, foi denunciado ante a Sección de Aduanas e Impostos Especiais de Pontevedra por contrabando, ao non acreditar a legal importación das máscaras, e ante a Consellería de Sanidade por non estar dado de alta como vendedor ou distribuidor de produtos sanitarios.
Igualmente, foi denunciado ante a Consellería de Innovación, Industria e Comercio por contravenir a lexislación de protección xeral das persoas consumidoras e usuarias ao incumprir as disposicións sobre etiquetaxe e marcado dos produtos. Finalmente, as máscaras foron entregadas á Consellería de Sanidade.
