O Concello de Vigo habilitou unha plataforma ‘en liña’ de para solicitar unha cita previa de acceso á Cabalgata, que contará con oito carrozas ‘estáticas’ que se situarán na avenida de Castelao o próximo 5 de xaneiro e na que os Reis Meigos utilizarán máscara.

Nunha rolda de prensa celebrada en Vigo, o alcalde, Abel Caballero, explicou que se conformarán dúas filas desde a Praza de América para acceder ás carrozas, unha para as persoas que conten con cita previa e outra para as que non realizasen a solicitude.

As reservas poden efectuarse desde este martes a través da páxina web do Concello, onde se permite escoller a entrada por tramo horario, con intervalos de 15 minutos en cada pase, que se limitará a grupos de ata seis persoas. Unha vez realizada a reserva, envíase un código QR que os solicitantes poden descargar no seu teléfono móbil ou recibir por correo electrónico para presentar o resgardo no momento do acceso.

O rexedor precisou que o horario de apertura do percorrido estará comprendido entre as 12,00 e as 15,30 horas e entre as 16,00 e as 20,00 horas, así como que a temática escollida para este ano foi “Civilizacións do mundo na historia”.

Durante o evento, avanzou que se repartirán “miles de bolsas con caramelos” ás crianzas, aínda que se reducirá o número de paxes por seguridade. Deste xeito, a Cabalgata ‘estática’ estará conformada polas carrozas do tres Reis Meigos, a da carteira real, a da Policía Local e outros tres correspondentes a distintas institucións.