O alcalde de Vigo, Abel Caballero, destacou a afluencia rexistrada nas novas ramplas mecánicas instaladas no bulevar da Gran Vía, que representan “a estrela do Nadal”, que o ano pasado “foi a nora”.
O rexedor asegurou que a estrutura supón “un grande atractivo” polo que pasaron “ducias de miles de persoas” nos últimos días. “Todo Vigo visita as ramplas cunha opinión favorable”, subliñou Caballero.
No entanto, culpou de que a estrutura “non chegue ata a Praza de España” ao “gran desfacedor de Vigo”, ao que identificou como o presidente da Xunta, Alberto Núñez Feijóo, dado que “o seu principal labor na cidade” é “desfacer cousas”. Así, criticou que o Goberno galego “parase” o desenvolvemento das ramplas ata a Praza de España “co aplauso do PP, o BNG e Marea de Vigo”.
Ademais, o alcalde sinalou que no semáforo próximo á confluencia da Gran Vía con Urzáiz prodúcese “unha grande aglomeración” de persoas, da que responsabilizou a Feijóo por “non permitir” que as ramplas se instalasen na parte baixa da avenida. Como consecuencia, reprobou que os viandantes “teñan que subir á beira da estatua dos ‘Redeiros’ por unha beirarrúa de pouco máis dun metro” por unha “decisión política”.
ESCULTURA
Así, o rexedor incidiu en que “agora todo o mundo accede polo centro” á Gran Vía, en alusión á confluencia coa rúa María Berdiales, onde comezan as ramplas mecánicas. Por iso, afirmou que “non hai perspectiva” para observar a escultura e preguntouse se debe “valala” ante a “aglomeración” que se rexistra nas súas inmediacións, onde sinalou que se produce un desnivel de auga.
Abel Caballero volveu defender a proposta realizada polo goberno local cando se proxectou o deseño das ramplas mecánicas, que pasaba por desprazar a estatua do ‘Monumento ao traballo’, coñecida como ‘Os Redeiros’, a Isaac Peral. Así mesmo, resaltou que a obra “non está feita” para a Gran Vía, xa que foi “feita por encargo dun municipio do norte que despois non a comprou”, polo que “veu para Vigo”.
Noutra orde de cousas, o alcalde criticou que a Xunta adquirise un mural de Luís Seone para situalo na Cidade da Cultura, polo que se preguntou se “en Galicia só existe Santiago”. Nesta liña, insistiu en que a obra podería instalarse en Vigo, onde “pago pola Xunta non hai nin un só mural nin un só cadro”.
