O reitor da Universidade de Vigo (UVigo), Manuel Reigosa, alertou de que a pandemia agravou a desigualdade de xénero entre os investigadores. Así o manifestou este xoves durante a súa intervención na comisión de reactivación do Parlamento de Galicia.
Durante a súa intervención, Reigosa puxo o foco en como a crise do covid afectou de forma desigual a homes e mulleres dedicados ao ámbito da investigación científica: “mentres que a produción científica nos homes viuse potenciada durante os meses de confinamento, no caso das mulleres empeorou debido á fenda de coidados”.
Neste sentido, sinalou que, no caso dos homes, a súa labor investigadora “lonxe de verse prexudicada, viuse reforzada” chegando a publicar “máis que outros anos”. Por contra, a produción científica por parte de mulleres “empeorou” debido ás obrigas que teñen nos seus fogares á hora de atender coidados que recaen de forma pronunciada sobre elas.
Unha realidade, o desigual impacto de desenvolver as funcións desde o fogar que, como incidiu o reitor da Universidade viguesa, debe terse en conta a futuro na organización do teletraballo.