O Concello de Vigo aprobou a contratación de 23 persoas (por 41.000 euros) que, durante o tempo que estea acendido a iluminación do Nadal, vixiarán que se respecten os aforamentos nas rúas do centro e que as persoas que acudan a gozar das luces e os adornos cumpran as normas anticovid.

Así o anunciou este venres en rolda de prensa o alcalde, Abel Caballero, que detallou que estas persoas serán as encargadas de controlar, con axuda de cámaras (cuxa instalación aínda está pendente), que non haxa máis persoas das permitidas en determinadas zonas, que estarán acoutadas por valos; que se respecten as distancias; ou que todo o mundo faga uso do xel desinfectante que haberá en dispensadores.

O rexedor sinalou, con respecto á iluminación, que aínda non hai data concreta para o acceso, e que será algo que o Concello “falará” cos hostaleiros, para que coincida coa reapertura dos seus negocios.