O Goberno central di que haberá avances sobre a saída sur de Vigo en “un ou dous anos”

Prevé adxudicar "a principios" do ano que vén o "estudo de alternativas" para a construción da saída ferroviaria. A Xunta reclama ao Goberno o seu "impulso" e lembra que lle remitiu un estudo.

Recreación da futura estación de Vigo / CEETRUS

O Goberno central prevé adxudicar “a principios” do ano que vén o “estudo de alternativas” para a construción da saída sur ferroviaria de Vigo, e espera que haxa “avances das actuacións” nun prazo de “un ou dous anos”. Así o trasladou o secretario de Infraestruturas do Ministerio de Transportes, Mobilidade e Axenda Urbana, Sergio Vázquez Torrón, tras manter un encontro co alcalde da cidade, Abel Caballero.

Vázquez Torrón apuntou que nos Orzamentos Xerais do Estado hai dotación para a realización dese estudo, que se vai licitar en próximos meses e que terá un “triplo obxectivo”: por unha banda, unificar o tránsito de viaxeiros na estación de Urzáiz; por outro, mellorar a conectividade de mercadorías; e que servirá tamén para “garantir” a conexión con Portugal desde o Eixo Atlántico.

Pola súa banda, o alcalde subliñou que a saída sur ferroviaria da cidade “xa é un fenómeno imparable”, e lembrou que, cando chegou ao goberno da cidade, a previsión do anterior Goberno central (do PP) era construír a entrada do AVE en Vigo mediante unha gabia e practicamente a cota cero, o que impedía facer a saída sur. “Cometeuse un inmenso erro histórico”, engadiu, e proclamou: “Felizmente, eu gañei as eleccións, falei co Goberno de España e fixemos que o tren entrase en túnel”.

Na reunión con Sergio Vázquez tamén se abordaron as conexións viarias da cidade e, en concreto, a construción da nova autovía ao Porriño, que inclúe un túnel. Respecto diso, o secretario de Infraestruturas confirmou que o Concello de Vigo expuxo unha solución alternativa ao túnel previsto, que é “máis ambiciosa” pero con maiores garantías ambientais, xa que serviría para salvar o curso do río Eifonso.

“Tamén falamos dun posible novo acceso de conexión ao porto e dun mellor aproveitamento de terreos do Porto e de Adif (…), para o que se vai crear un grupo de traballo”, explicou Vázquez Torrón que, cuestionado sobre a ligazón da AP-9 na rúa Buenos Aires, limitouse a constatar que hai “unha problemática na configuración da autoestrada” e que se traballará “a medio prazo”.

Finalmente, o rexedor referiuse ao anuncio do PP de que presentará unha emenda aos Orzamentos Xerais do Estado para que se fixe unha partida para suprimir a peaxe da AP-9 entre Puxeiros (Mos) e Vigo. Respecto diso, criticou a “desenvoltura” desta proposta, e cuestionou por que o PP non suprimiu esa peaxe cando estaba no Executivo central.

XUNTA

A Consellería de Infraestruturas e Mobilidade reclamou ao Goberno central “o impulso decidido” da conexión ferroviaria de Vigo, coñecida como saída sur, sobre a que lembrou que realizou un “completo estudo técnico e económico” que lle trasladou en xullo xunto ao Porto da cidade.

Esixiu ao Executivo central “unha mostra de compromiso” con esta actuación, que sinalou que pode cofinanciarse con fondos europeos do mecanismo Conectar Europa ou de reconstrución.

Nesta liña, a Xunta recalcou que esta conexión ferroviaria representa “unha actuación absolutamente prioritaria e necesaria” para a “competitividade” do Porto de Vigo e o tecido empresarial da área, así como para “apontoar” as relacións entre o sur de Galicia e o norte de Portugal.

Por iso, lembrou que encargou “un estudo custo-beneficio” da saída sur e a conexión ferroviaria da terminal portuaria de Bouzas que acreditou que esta actuación levaría “unha enorme rendibilidade económica e social”. De feito, apuntou que alcanzaría un índice de rendibilidade do 9,73%, “case o dobre do requirido para proxectos deste tipo por Adif”.

Así, o proxecto permitiría unir Vigo coa zona do Porriño cun novo trazado de máis de 15 quilómetros e contemplaría a conexión coa terminal portuaria de Bouzas mediante un novo ramal de 5 quilómetros.