Vigo alcanzou unha taxa de 220,7 novos casos de COVID-19 por cada 100.000 habitantes nos 14 días anteriores ao 25 de outubro.

Así o confirmou este mércores o alcalde da cidade, Abel Caballero, nunha comparecencia na que precisou que o conselleiro de Sanidade, Julio García, trasladoulle estes datos durante unha conversación telefónica mantida este martes. Nesta liña, destacou que a cidade olívica presenta unha taxa inferior á autonómica e que representa “case a metade” da nacional, que se sitúa en 410 novos casos por cada 100.000 habitantes.

Ademais, avanzou que, na conversación mantida este martes, Julio García convocouno a unha reunión que se celebrará este xoves por videoconferencia. Abel Caballero confirmou que participará na sesión, que representa unha “boa vía de cooperación” coa Xunta que sinalou que reclama “hai meses”.

Preguntado polos medios, Abel Caballero avanzou que neste encontro informaráselle da taxa de casos positivos en relación ás PCR realizadas na cidade e proporcionaráselle unha análise da situación da mesma en relación á evolución da pandemia.

Tamén indicou que na reunión deste xoves pedirá “os datos de contaxios en termos diarios” e que estas citas sexan periódicas. Tamén solicitará que se dupliquen as PCR diarias realizadas na cidade ata alcanzar entre 2.500 e 3.000 e o número de rastreadores, ademais dun reforzo do sistema de Atención Primaria.

Cuestionado sobre o establecemento dun posible confinamento de municipios, insistiu en que non se pronunciará sobre “hipóteses”, pero afirmou que “non discutirá” as medidas de adopten a Consellería de Sanidade e o Ministerio de Sanidade para conter os contagios.