O sindicato Alternativas na Xustiza-CUT denunciou que non se someteu a probas PCR ou corentena a traballadores dun xulgado de Primeira Instancia de Vigo no que se detectou un caso positivo de COVID-19.

Fontes da central explicaron  que se trata dunha traballadora que, tras atoparse mal durante algúns días, decidiu ausentarse o pasado venres. Posteriormente, someteuse a unha proba de detección de coronavirus que deu un resultado positivo, unha situación da que se informou aos empregados do xulgado.

Con todo, as mesmas fontes reprobaron que non se lles recomendase someterse a probas PCR ou gardar corentena a pesar de que a persoa contaxiada adoita estar “en contacto directo” con ao redor dunha decena de funcionarios. Así as cousas, lamentaron que o Goberno galego non se puxo en contacto con estes traballadores.

Ademais, nun comunicado, o sindicato lamentou que “a Xunta siga sen comprender” a importancia de “actuar de maneira inmediata e co mesmo criterio” nos distintos casos de positivos detectados.

Neste sentido, Alternativas na Xustiza-CUT lembrou que o pasado mes de agosto denunciou “a negativa da Xunta” a pór en corentena aos traballadores do Xulgado do Penal 1 de Pontevedra e o de Primeira Instancia 2 da mesma cidade que estiveran en contacto con positivos.

Así, sinalou que, tras esa denuncia, “tomáronse as medidas de seguridade necesarias de modo inmediato” e lamentou que non se actuou do mesmo xeito en relación ao xulgado de Vigo no que se detectou un caso.

Así mesmo, detallou que “en cada xulgado hai 10 traballadores que están en contacto directo durante oito horas diarias” e os profesionais deben trasladar “documentación entre distintos xulgados” debido á “falta de investimento” do Goberno galego.

De feito, a central apuntou que este mércores se realizaron comparecencias e poderes apud-acta con cidadáns no xulgado vigués, así como que procuradores e avogados accederon ao mesmo.

Por iso, criticou que o Executivo galego “publique unha resolución na que se ditan instrucións para sancionar ás persoas que non cumpren a corentena” mentres se nega a someter á mesma ou a PCR “a compañeiros que estiveron en contacto con positivos”.

RESPOSTA DA XUNTA

Pola súa banda, fontes da Xunta confirmaron que se tivo coñecemento dun positivo nos xulgados de Vigo, polo que se activou o protocolo correspondente.

Deste xeito, ordenouse a limpeza do despacho da persoa contaxiada e as zonas comúns. Ademais, trasladouse á Xefatura Territorial de Sanidade, a responsable do seguimento, a decisión de realizar máis probas PCR ou illar a outras persoas.